e. basil

Basil er komið úr grísku af orðinu “basilíkon”, sem merkir konunglegur. Víða var siður að láta sjálfan konunginn slá fyrstu uppskeruna með gullsigð. Basiljurtir tilheyra varablómaætt og telja fjöldann allan af tegundum. Algengasta basilið til matargerðar er basilíka, e. basilicum. Það er 30-60 cm hátt með grænum blöðum og stilk.

Uppruni

Á Indlandi og löndunum þar í kring. Stærstu framleiðendur basils eru Ítalir og Frakkar.

Notkun

Basil er mest notað í löndum við Miðjarðarhaf sem og í Taílandi. Þá hefur notkun basils aukist verulega í Ítalíu, Frakklandi sem og annarsstaðar í Norður-Evrópu. Basil er mikið notað við ítalska matargerð, s.s. í ýmsa tómat-, pastarétti sem og á pizzu. Gott er að nota basil á íslenska lambakjötið, kálfakjöt, með hvítfisk og sjávarfangi og ýmsa grænmetis- og ostarétti. Eitthvert frægasta form basils er í formi pestó þar sem blandað er ferskum basil saman við hvítlauk, parmesan ost, furuhnetur og ólífuolíu. Basil þolir ekki mikla eldun, það verður rammt á bragðið og því ber að nota það rétt fyrir lok eldunar.

Geymsla

Basil er mjög viðkvæm jurt og geymist illa eftir skurð. Best er að frysta það eftir skurð eða geyma í olíu. Til styttri geymslu er best að setja það í vatn, hvolfa plastpoka yfir það og geyma á svölum stað helst um 12 gráður. Blöð basils verða fljótt svört og eyðileggjast við of mikla kælingu.