Galisíubúar eru miklir fiskimenn og er úrvalið af sjávarréttum stórkostlegt. Þeir eru líka frægir fyrir skelfiskrétti sína en skelin er heilagt tákn á meðal pílagríma sem flykkjast árlega til Santiago de Compostella, eftir að hafa farið pílagrímsför á tveim jafnfljótum alla leið frá Bilbao í Baskalandi eða jafnvel lengra. För þeirra endar svo í kirkju einni sem geymir skrín hins heilaga Jakobs sem pílagrímsförin er kennd við.

Uppskriftir frá Galisíu:

Empanadas kaka
Fyrir 4-6

450 gr hveiti

2 tsk þurrger

Salt

3 dl ylvolg mjólk

2 eggjarauður

1 egg hrært

Hnífsoddur af anís

Fylling:

2 msk ólífuolía

2 laukar saxaðir

225 gr bufftómatar

400 gr túnfiskur í olíu síaður

1 stór rauð paprika

6 svartar ólífur steinhreinsaðar og skornar í fernt

4 saffranþræðir

Leiðbeiningar:

1. Sigtið hveitið og klípu af salti í skál. Hrærið gerinu út í. Hrærið mjólkinni í eggjarauðurnar, bætið við anís, hellið þessu svo hægt út í mjölið og hrærið stöðugt. Hrærið í 5-10 mínútur þar til deigið losnar auðveldlega frá skálinni.

2. Hvolfið deiginu á lítillega mjölborið borð og hnoðið þar til það verður þjált og teygjanlegt. Mótið deigið í 2 jafnstórar kúlur, setjið þær í smurða skál, byrgið og látið standa á hlýjum stað þar til umfangið tvölfaldast eftir ca 1 klst.

3. Nú er komið að fyllingunni. Hitið olíuna á steikarpönnu, látið laukinn í og steikið og hrærið öðru hvoru í u.þ.b. 4 mínútur þar til hann mýkist. Flysjið, fræhreinsið og saxið tómatana, hrærið þeim út í pönnuna og látið krauma þar til þykknar. Flísið túnfiskinn. Flysjið og saxið paprikuna og hrærið henni út í pönnuna ásamt túnfiskinum og ólífunum. Myljið saffranþræðina og leysið upp í 2 msk af heitu vatni. Látið saffranið í pönnuna. Látið krauma þar til vel samlagast, setjið þá til hliðar.

4. Forhitið ofninn í 200 gráður. Smyjið ofnplötu, fletjið deigkúlurnar hvora í sínu lagi á mjölbornu borði í þunnan ferning. Færið annan deigferninginn yfir á bökunarplötu. Smyrjið fyllingunni yfir deigið en skiljið eftir auða rönd meðfram öllum hliðum. Leggið hinn deigferninginn yfir og þrýstið jöðrunum saman. Gljáið með hrærðu eggi og skerið rauf í miðjuna. Bakið í 15-20 mínútur þar til gyllist. Berið kökuna fram heita skorna í ferninga.