 Loire-dalurinn er ekki þekktur sem „Garðurinn í Frakklandi“ að ástæðulausu. Veitingahúsin í Loire eru yfirfull af unaði matargerðarlistarinnar og í héraðinu eru óendanlegir möguleikar á ferskum matvælum og ljúfmeti. Í skógunum vex mikið af trufflum og sveppum og þar hleypur villibráðin um, t.d. villisvín, hirtir og fasanar. Bændurnir rækta besta spergil, jarðarber og grænmeti sem um getur og í ánum er ótrúlegt úrval af fiski.
Loire er frægt fyrir milt loftslag og frjósama jörð en þetta eru gæði sem gera kleift að framleiða bestu ávexti og grænmeti sem fyrirfinnast nokkurs staðar. Úr ávaxtagörðum í Anjou koma plómur nefndar Reine Claudes, eftir drottningu François 1., og hin safaríka Anjou-pera. Markaðsborð svigna undan sumarávöxtunum, sérstaklega aprikósum. “Tarte tatin”, sem er eins og öfug eplaterta, er sögð upprunnin í Lamotte-Beuvron. Spergill, sérstaklega hið svera hvíta afbrigði, birtist í frauðkökum, eggjakökum og öðrum eggjaréttum og líka einn og sér með salatsósu sem gerð er úr valhnetuolíu af svæðinu.
Kjarninn í matarhefð héraðsins er í vötnunum. Í Loire og nærliggjandi svæðum fæst lax, silungur, vatnakarfi og gedda, borin fram grilluð í salthjúp eða með beurre nantais (smjöri, skalottlauk og vínsósu). Atlantshafsströndin spillir gestum með sínum frábæra skelfiski; ostrur, krækling, rækjur, humar og krabba geta þeir fengið hvenær sem er dagsins og með hvaða sósu sem um getur í veitingahúsum sem eru við hafnirnar. Í kringum Guérande býður sjórinn upp á fleur de sel, náttúrulegt og óunnið salt sem gefur bragðbæti nýja merkingu.
Ostar í héraðinu eru venjulega úr kúamjólk enda þótt Crémet d’Anjou, geitamjólkurostur sem hefur verið núinn að utan með klút vættum í víni, hafi orðið uppáhald margra. Aðrir eftirtektarverðir ostar eru feitu geitamjólkurostarnir Valencay og Sainte Maure de Touraine sem er velt upp úr ösku. Crottin de Chavignol er ef til vill vinsælasti geitaostur héraðsins. Hann er mótaður eins og lítill sívalningur og er frá smáborginni Chevignol.
Ábætisréttir eru meðal annarra tarte tatin, karamelluhúðuð eplaterta á hvolfi sem líka er hægt að búa til úr perum, gâteau nantais með möndlum og rommi eða ávaxtasalat sem víni hefur verið hellt ótæpilega yfir og er borið fram með sablés, smjördeigskökum frá Sablé-sur-Sarthe. Anjou hefur sérrétti eins og crêpes angevines (pönnukökur fylltar með eplum sem eru gegnvot af Cointreau).
Uppskrift frá Loire:
Tarte tatin - Eplabaka á hvolfi
100 g smjör 100 g hvítur sykur 6 stór epli 3 msk ferskur sítrónusafi 200 g smjördeig
Leiðbeiningar:
1. Pannan sem er notuð skiptir miklu máli fyrir þennan rétt, hún þarf að vera þykkbotna og þola háan hita í ofni.
2. Stillið ofnin á 200°C.
3. Fletjið smjördeigið og skerið jafnstóran hring og ummálið á pönnunni sem þið notið, þetta verður þá eins konar lok á pönnuna. Setjið deiglokið til hliðar með plastfilmu yfir svo það þorni ekki.
4. Flysjið öll eplin, fjarlægið kjarna og skerið eplin í báta. Hellið sítrónusafa yfir til að koma í veg fyrir að eplin verði brún.
5. Bræðið smjör og sykur saman á pönnunni, raðið svo eplunum í fallegan hring á pönnuna, leyfið þessu að krauma á miðlungshita þar til sykurinn fer að brúnast, það tekur um það bil 15–20 mínútur. Setjið nú smjördeigslokið á og þéttið niður með hliðum pönnunnar.
6. Bakið í ofni í 15–20 mínútur eða þangað til deigið hefur lyft sér og er orðið gullinbrúnt., Hvolfið yfir á disk, stráið flórsykri yfir og berið fram strax.
|
