 Það er hvergi betra að drolla við matborðið en í Rhône-Ölpunum, þar sem höfuðborgin Lyon er þekkt sem miðborg matargerðarinnar. Svæðið liggur í Suðaustur-Frakklandi við landamæri Ítalíu og Sviss, það er stórt og fjölbreytileiki þess mikill, með Mont Blanc, hæsta fjall Vestur Evrópu, fögur vötn, fossa og unaðslega vínakra. Fjölbreytnin speglast líka í hinum ríkulega matargerðararfi héraðsins. Ímyndið ykkur upprunastað “reblochon” rjómaostsins þar sem kastaníuhnetur eru tíndar, þar sem loftið þurrkar pylsur og “saucisson” er framleitt. Réttir eins og “tartiflette”, ljúffengur pottréttur með kartöflum, lauk, hvítvíni, fleski og miklu af reblochon-osti, hafa verið snæddir í margar aldir.
Úr fjallavötnunum fá matargerðarmeistarar svæðisins silung, vatnakarfa, geddu og aborra og mikið af vatnarækju, en úr skóginum kemur villibráðin, svo sem skógarsnípa, rjúpa og lynghæna. Nautgripir éta villt ber og jurtir og verða að besta nautakjöti í landinu. Úr vatnarækjunni er búin til hin fræga “Nantua Sauce” sem inniheldur rjóma og vatnarækjukraft og er oft borin fram með nautalundum.
Svæðið hefur mörg sérkenni og á meðal þeirra hinn heimsfræga “Poulet de Bresse” sem margir telja besta fuglakjöt í heimi. Bresse-kjúklingurinn er oft borinn fram að Lyonnaise-hætti, fylltur með trufflum og soðinn í hvítvínssoði eða með skógarsveppum og rjómasósu.
Meðal margra osta má nefna “Tomme de Savoie”, “Bleu de Bresse” og “Vacherin” auk fjölda sérstaklegra feitra geitaosta sem kryddaðir eru með hnetum og hunangi.
Möndlufylltar bökur og sykurhúðaðar kastaníukökur sem bleyttar hafa verið með Chartreuse-líkjör ásamt núggati og “marron Glaces”, sykurhúðuðum kastaníum, eru dæmi um sætindi sem framleidd eru í héraðinu.
Uppskrift frá Rhone:
Nantua-sósa - Rjómalöguð humar- og tómatsósa
2 msk grænmetisolía 15 stk humar, (heilir og með skel) 150 g gulrætur – smátt saxaðar 100 g sellerí – smátt saxað ½ hvítlaukshaus 1 tsk svört piparkorn 1 lárviðarlauf 6 sveppir – saxaðir 150 ml koníak 4 tómatar – saxaðir 2 msk steinselja – söxuð 1 tsk ferskt estragon eða þurrkað 4 msk tómatþykkni 1 lítri fisksoð 400 ml rjómi
Leiðbeiningar:
1. Hitið olíu í stórum potti með þykkum botni.
2. Bíðið þar til olían er orðin vel heit, steikið humrana með skelinni á í eina mínútu.
3. Bætið út í pottinn hvítlauk, gulrótum, selleríi, sveppum, piparkornum og lárviðarlaufi, steikið þetta í 2–3 mínútur .
4. Bætið út í koníaki og flamberið.
5. Lækkið hitann, brjótið upp humarinn með kökukefli eða svipuðu og merjið allt grænmeti.
6. Bætið við tómötum, steinselju, estragon, tómatþykkni og fisksoði, leyfið þessu að malla á lágum hita í 20 mínútur.
7. Nú þarf að sía soðið frá og setja í hreinan pott, sjóðið soðið niður um helming. Bætið við rjóma, salti og pipar og látið sjóða í 5–10 mínútur eða þangað til þetta er orðið að þykkri sósu.
|
