Toscana-matargerð er oft lýst sem “una cucina povera”, þ.e. fátæklegu eldhúsi. Einkennandi fyrir allan mat í Toscana eru hin miklu gæði hráefnanna og fjölbreytt notkun kryddjurta þar sem hæst ber timjan, salvíu, rósmarín, estragon, fennel og rauðan pipar. Olía og brauð eru áberandi í þessari einföldu matargerð. Grænmeti, hvort sem það er grillað, steikt eða hrátt, er alltaf bragðbætt með ólífuolíu. Og engin Toscana-máltíð væri fullkomin án hins hefðbundna ósaltaða brauðs.

Toscana-búar halda sig frá feiti en halla sér fremur að matreiðslu á spjóti eða grilli. Lambakjöt, nautakjöt, kjúklingur og kanínukjöt er venjulega steikt með rósmarín eða fennel eða grillað. Flestir réttir eru bornir fram með sítrónubátum sem koma í stað sósu. Með ströndinni eru réttir búnir til úr fiski, t.d. álaungum sem veiddir eru í mynni Arno-árinnar, sérréttur sem aðeins er hægt að fá í Toscana.

Ólífuolía er svo vinsæl í matargerð Toscana að hún er jafnvel notuð sem sætindi, eins og uppáhaldsrétturinn á svæðinu, “castagnaccio”, sem er kaka með ólífuolíu, kastaníuhnetumjöli, fennel, rúsínum og furuhnetum. Venjulega eru ábætisréttir jafn einfaldir eins og annar matur í Toscana. Algengur eftirréttur er biscotti sem dýft er í sætvín héraðsins, “Vin Santo”. “Panforte” (sterkt brauð) er bragðmikil, flöt kaka sem var fundin upp á krossfaratímanum og nýttist hermönnunum en er nú borðuð um alla Ítalíu, sérstaklega um jólaleytið.

Uppskrift frá Toscana:

Kastaníu-, rósmarín- og sítrónukaka

500 g kastaníuhnetumjöl

50 ml vatn

50 g furuhnetur

50 g valhnetur

100 g rúsínur

50 ml ólífuolía

1 egg

rósmarín

sítrónubörkur

Leiðbeiningar:

1. Stillið ofninn á 190°C.

2. Leysið mjölið upp í vatninu, bætið svo við hnetum, eggi, rúsínum, olíu og laufunum af stórum rósmarínstilk.

3. Þetta á að vera mjög þykkt deig. Setjið í vel smurt skúffukökuform. Bakið í einn klukkutíma eða þar til skorpa hefur myndast á yfirborðinu.