Svarið fer ansi mikið eftir aldri geitarinnar. Fyrir kjöt af kiðlingum og mjög ungum geitum er hægt að nota nokkurn veginn hvaða lambakjötsuppskrift sem er og fá mjög góðan árangur - kjötið er bæði bragðgott og magurt - en þar sem lærið er svona stórt geri ég ráð fyrir að það sé af fullorðinni geit. Þá er þetta dálítið meira mál því að kjötið er svo afskaplega magurt og hætt við að það verði allt of þurrt og seigt við venjulega steikingu. Því er kjöt af fullorðnu gjarna haft í pottrétti o.þ.h. og ég mæli sérstaklega með geitakjötskarríréttum, indverskum eða karabískum.

En það eru til aðferðir til að steikja læri af fullorðnu og þá er alltaf um að ræða langa steikingu við hægan hita. Gott er að marínera lærið t.d. í ólífuolíu, sítrónusafa og kryddjurtum (til dæmis timjani, lárviðarlaufi, hvítlauk) yfir nótt og steikja það svo við hægan hita (150°C eða helst minna, jafnvel niður í 110°C) í nokkrar klukkustundir - breiða álpappír e.t.v. lauslega yfir og fjarlægja hann svo og hækka hitann í lok steikingartímans til að fá betri lit á geitina. Tíminn er óviss - ég hef sjálf aldrei steikt svona stórt geitalæri og heimildirnar mínar eru dálítið misvísandi - en þegar kjöthitamælir sýnir 65°C ætti að vera kominn tími til að taka lærið úr ofninum.

Það er líka hægt að byrja á að marínera lærið í rauðvíni, sítrónusafa og kryddjurtum, pakka því svo inn í álpappír (hafa þó smágöt neðan á svo safi geti runnið út) og steikja við 120°C í nokkra klukkutíma.

Svo má líka krydda kjötið mun meira, búa til kryddblöndu (spice rub) úr t.d. papriku, chilipipar, kummini, óreganó, hvítlauk, svolitlum sykri og e.t.v. fleiru og núa vel inn í allt lærið (eða nota einfaldlega chiliduft (chili powder, ekki pepper) með einhverjum viðbótum).