Ég er búin að kaupa rúmlega 6 kílóa kalkún fyrir fjölskylduna. Í fyrra fylgdum við uppskrift Nigellu og létum kalkúnann standa í vatnsbala í fjóra daga ásamt allskonar kryddi. Mér fannst þetta fyrst og fremst stúss og gat alls ekki fundið að kryddið smitaðist inn í kalkúnann. Hvað er einfaldast að gera - ég á þrjú börn og langar fyrst og fremst að gera eitthvað gott en einfalt. Hverju mælir þú með?
Nigella er náttúrlega með tvær aðstoðarmanneskjur í eldhúsinu þegar hún gerir þættina sína ...
Reyndar hef ég oft mælt með því að kalkúnar séu lagðir í saltpækil fyrir matreiðslu en ekki í fjóra sólarhringa og ekki beinlínis til að krydda þá, heldur til að þeir verði safaríkari eftir steikinguna. Aðferðin virkar og mér finnst þetta satt að segja minna vesen en að ausa yfir fuglinn á korters fresti, snúa honum reglulega, leggja viskastykki vætt í bráðnu smjöri yfir eða annað sem mælt er með. En það er alveg nóg að hafa hann í 10-12 tíma í pæklinum. Ég mundi nota u.þ.b. 100 g af salti og 50 g af sykri í hvern lítra af vatni og passa að það leysist alveg upp. Láta fuglinn liggja í þessu á köldum stað (úti á svölum dugir væntanlega á þessum árstíma) í svona hálfan sólarhring, það á að fljóta yfir hann. Svo er bara að skola vel af honum í köldu, rennandi vatni, þerra hann með eldhúspappír og steikja.
Ég er vön að byrja á háum hita, 225°C eða svo, og þegar kalkúnninn er farinn að taka lit lækka ég niður í 170°C eða svo og steiki áfram í svona 3 klst. alls (miðað við 6 kg kalkúna, ófylltan) en tíminn ræðst þó af svo mörgum þáttum (stærð og lögun fuglsins, hitastigi hans þegar steiking hefst, fyllingu o.fl.) að það er alltaf öruggast að nota kjöthitamæli, stinga honum í lærið þar sem það er þykkast og steikja þar til hann sýnir 75-77°C. Svo er fuglinn látinn bíða í a.m.k. 25-30 mínútur undir álpappír á hlýjum stað og athugaðu að steikingin heldur áfram um stund og hitinn á kjötmælinum hækkar um nokkrar gráður á meðan.
Ekki ætti að þurfa að snúa fuglinum eða ausa yfir hann en þegar bringan er orðin hæfilega brún er gott að breiða álpappír lauslega yfir hana til að hlífa henni. Ég steiki kalkúna yfirleitt ekki með fyllingu (eða þá bara lítilli fyllingu) en baka svo fyllinguna sér í formi. - Ég nota þessa steikingaraðferð líka þótt ég hafi ekki lagt kalkúnann í pækil fyrir steikingu en þá eys ég yfir hann af og til, a.m.k. þar til ég breiði álpappírinn yfir bringuna.
Mér finnst semsagt einfaldar aðferðir yfirleitt gefa bestan árangur en það eru örugglega margir ósammála; þegar kalkúnasteiking er annars vegar eiga flestir sína uppáhaldsaðferð og þetta er mín (með einni undantekningu eða tveimur - en það eru sérviskulegri aðferðir).
