|
Þetta hérað liggur að landamærum Spánar og þar er notað mikið af tómötum, papriku og krydduðum pylsum í matargerð. Maturinn er að mörgu leyti svipaður og á Spáni. "Cassoulet", pottréttur úr garðbaunum, kindakjöti, svínakjöti eða pylsum og aligæs er einkennisréttur Languedoc. Roussillon hefur svipaðan rétt sem nefnist “ouillade”. Það eru líka sterk spænsk og katalónsk áhrif í Roussillon, með tapasréttum sem eru bornir fram á mörgum börum. Réttir eru yfirleitt einfaldir en kjarnmiklir með miklu af kjöti, fitu og salti. Vinsæll réttur er “Poulet Basque” sem er kjúklingakássa með tómötum, lauk, papriku og hvítvíni og "piperade" er þægilegur réttur frá Baskahéruðunum sem í er paprika, laukur og tómatar ásamt skinku og eggjum. Mayonne-skinka er venjulega borðuð sneidd niður á brauð en er líka hráefnið í "jambon à la Bayonnaise" (skinka soðsteikt í Madeiravíni).
Annar uppáhaldsréttur á veturna, sérstaklega í fjallahéruðunum fjarri ströndinni, er villisvín sem finna má á mörgum matseðlum. Matarhefð í Languedoc byggist mikið á notkun eigin framleiðslu, ólífuolíu, tómatsósum, kryddjurtum úr náttúrunni á svæðinu eins og blóðbergi og rósmarín. Ef þú vonast eftir þykkum sósum með rjóma skaltu leita annað.
Það er óvenjulegt að finna sauðfé og nautgripi á beit á ökrum í þessum hluta Frakklands. Því eru mjólkurvörur oft ekki notaðar í matrétti sem líka sér stað í því að hjartasjúkdómar í suðurhluta landsins eru miklu sjaldgæfari en í Norður-Frakklandi þar sem smjör og rjómi eru mun meira notuð í mat.
Gott dæmi um matarrétt í Languedoc-Roussillon í Suður-Frakklandi, sem er sívinsæll allt árið, er “confit de canard”, gómsætir bitar af andakjöti sem hefur verið lagt í náttúrulega fitu fuglsins til að fá meira bragð. Ólífur eru notaðar í fjölda rétta og einnig gert úr þeim gómsætt ólífumauk, “tapenade”, sem er sérstakt uppáhald í Languedoc-kvöldverði og vinsælt hráefni í ýmsa rétti á svæðinu. Þetta svæði er líka vel þekkt fyrir trufflur eða hallsvepp, sem er sterkur svartur sveppur sem vex upp frá rótum sérstakra trjáa og er notaður til að bragðbæta allt frá ólífum til eggjahræru, jafnvel þó að hann sé mjög dýr. Spergill og villtir sveppir sem vaxa í skóginum við Cévennes-fjöllin eru notaðir þegar þeir eru fáanlegir. Aprikósur, ferskjur og kirsuber vaxa í héraðinu og eru vinsæl viðbót í ábætisrétti eins og “clafoutis”, sem er sætur búðingur búinn til úr eggjahræru. Ferskar fíkjur, bornar fram með rjómaosti úr geitamjólk, eru oft notaðar sem ábætir eftir máltíðir.
Á ströndinni er bærinn Séte frægur fyrir sitt “bourride”, fiskstöppu með hvítlauksmajones- aiolli. Annar fiskur, eins og karfi, túnfiskur og sardínur, er áberandi á matseðlum margra sjávarréttaveitingahúsa. Hér er einnig að finna hrísgrjóna- og saltframleiðslu héraðsins, sérstaklega í kring um Camargue.
Uppskrift frá Languedoc-Roussillon:
Kirsuberja Clafoutis
4 egg
1 bolli sykur
1 vanillustöng – skorin í hálft
1 msk brandí
1 bolli hveiti
1½ bolli mjólk
400 g fersk kirsuber, steinhreinsuð
Leiðbeiningar:
1. Stillið ofninn á 180°C.
2. Smyrjið eldfast mót sem er 24cm á lengd og sem þið ætlið að bera réttinn fram í.
3. Þeytið saman eggin og helming af sykrinum þar til blandan er orðin ljós og loftmikil.
4. Bætið út í þetta fræjunum úr vanillustönginni, brandí og hveiti, þeytið svo mjólk út í.
5. Blandið saman í skál kirsuberjum og sykri, stráið þessu svo jafnt í eldfasta mótið.
6. Hellið deiginu yfir og setjið í ofninn. Bakið í 40–45 mínútur.
7. Stráið 2–3 msk af sykri yfir og leyfið að standa í 5 mínútur áður en borið er fram.
|
Fróðleikur