Normandy er stærsti framleiðandi ostra í Frakklandi, svo stór að ein af hverjum þremur ostrutegundum sem borðaðar eru í Frakklandi koma frá Normandy. Sumar af bestu ostrum svæðisins eru frá St-Vaast-la-Hougue en önnur góð ostrusvæði eru Mont St-Michel-flóinn og Isigny-Grandcamp-ströndin.

Ekki er “coquilles St-Jacques” (hörpuskelfiskur) síður vinsæll en þetta er fínasti rétturinn á flestum veitingahúsum á ströndinni á veturna því hörpuskel er aðeins unnin frá október til maí. Normandy er mesta hörpuskelfisksvæði Frakklands og þaðan koma 65–75% af heildarframleiðslu landsins. Þar eru einnig framleidd 25–30% af kræklingsframleiðslu í Frakklandi, sem er markaðssettur undir merkinu Moules de Bouchot sem var skráð 1994 og tryggir hágæðakrækling.

Flatfiskur (e.sole) hefur jafnan verið talinn bestur fiska í matarhefð Normanna, sérstaklega í strandhéraðinu Seine Martime, en sandhverfa, vartari og borri eru allir vinsælir.

Mjólkurvinnsla er mikil í Normandy og smjör er þekkt sem “crus” en vín og freyðivín er líka framleitt þar. Isigny-svæðið er sérstaklega frægt fyrir smjörframleiðslu og rjómavörur. Ostur er líka áberandi með öllum réttum og veitingahús á Normandy halda við ostahefðinni. Þrír þekktustu ostarnir eru Camembert, hinn bragðsterki Pont l’eveque og Livarot.

Nautakjöt í þessu mjólkurafurðahéraði er oftast kálfakjöt af nautkálfum. Lambakjöt er sérréttur hins vestlæga Manche-strandhéraðs, en lömbin alast upp á söltum sléttum við Mont saint-Michel-flóann og beitilöndum við ströndina og kjötið verður því mjúkt og með sérstöku bragði.

Það fullkomnar máltíðina í Normandy-héraðinu að borða sneið af “tarte aux pommes” með þykkum rjóma og glasi af Calvados (eplasnafs).

Uppskrift frá Normandy:

Poulet Normandy - Rjómalagaður kjúklingapottréttur með eplum og pekanhnetum

2 msk hveiti

1 tsk þurrkað timjan

2 kjúklingabringur og -leggir

3 msk olía

150 ml brandí

100 g sneiddir sveppir

100 g saxaðar pekanhnetur

300 g flysjuð og sneidd epli

½ laukur sneiddur

250 ml eplasafi

250 ml rjómi

Leiðbeiningar:

1. Blandið saman hveiti og timjan í skál, þekið kjúklingabitana vel með hveiti.

2. Steikið bitana í stórri pönnu á vægum hita þar til byrjar að brúnast, hellið svo brandí á pönnuna. Eftir 2–3 mínútur er bætt við eplum, pekanhnetum, sveppum og lauk og eldað í 2–3 mínútur í viðbót.

3. Síðast skal hræra út í eplasafa og rjóma, leyfið þessu að malla í 3–5 mínútur og bragðbætið með salti og pipar.