Tvö mikilvægustu atriði matargerðar hér eru brauð og súpur. Brauð svæðisins, “Pane Nero” (svart brauð) er búið til úr rúgmjöli og er uppistöðuhráefni í mörgum uppskriftum. Pasta er ekki hefðbundið í þessu héraði en þess í stað eru polenta, hrísgrjón og gnocchi forréttirnir. Þar sem íbúar Ágústadals eru fjallafólk er villibráð sérlega mikilvægur þáttur í matargerð svæðisins.

Næstum öll mjólk sem framleidd er fer til framleiðslu á fontina, hinum smjörlíka hnetubragðsosti sem enn er unninn í litlum handverksmjólkurbúum og hefur verið framleiddur hér í næstum 700 ár. Næstum 8 milljón kíló af “Fontina Valle d’Aosta” eru framleidd árlega og mest af honum er borðað á Ítalíu.

Ávextir eru ekki áberandi í þessu héraði en epli, perur og villt ber eru ljúffeng og úr þeim eru búnar til sultur og ábætisréttir. Kastaníuhnetur af miklum gæðum vaxa hér og hunang frá Valle di Cogne er meðal þess besta á Ítalíu. Einn af hefðbundnum ábætisréttum héraðsins er “crema cotta”, (bakaður mjólkur- og eggjabúðingur) sem íbúar halda fram að sé upprunninn hér en Fjallaland eignar sér líka.

Uppskrift frá Ágústadal:

Bakaður vanillubúðingur

600 ml rjómi

50 g sykur

1 vanillustöng

4 blöð gelatín eða 3 tsk gelatínduft

3 msk mjólk

Leiðbeiningar:

1. Skerið vanillustöngina til helminga á lengdina.

2. Hitið rjóma ásamt sykri og vanillustönginni að suðumarki.

3. Leysið matarlímið upp í mjólkinni og hrærið út í rjómann.

4. Hellið í 5–6 mót og setjið í kæli, leyfið að kólna í að minnsta kosti fjóra tíma.

5. Hvolfið úr mótunum. Ef þetta er mjög fast má dýfa mótinu í heitt vatn í 30 sekúndur fyrst.

6. Það er mjög gott að bera fram rauðvínssoðnar plómur með eða aprikósur sem er búið að gegnhita í hunangi og smá líkjör.