Matur í Lígúríu er einkennandi fyrir loftslag héraðsins. Notuð eru mörg hráefni sem ætla mætti að væru álitin suðrænni. Mikil notkun hvítlauks, tómata og ólífuolíu í stað smjörs eða svínafeiti minna á matreiðslu svæðisins suður af Róm fremur en Lígúríu-svæðisins sem er nær Frakklandi en Napólí. Í Lígúríu er framleitt mikið af bragðgóðu og hollu grænmeti og gnægð af villtu salati og ilmandi jurtum, þ.á m. basil, rósmarín, timjan og marjoram. Ólífur eru mikið ræktaðar. Þær eru notaðar til að framleiða létta, sæta olíu sem er eina feitin sem notuð er í matreiðslu héraðsins. Ólífuolía héraðsins er talin vera með þeirri bestu á Ítalíu.

Frægasti rétturinn í þessu héraði er vel þekkta “Pesto”-sósan sem er frábær samsetning með öðrum sérrétti héraðsins, “Foccacia”, sem minnir eilítið á pitsu en er samt brauð og er oftast krydduð með rósmarín og miklu af ávaxtabragðsólífuolíunni frá Lígúríu.

Hveiti, kikertubaunir og kastaníuhnetur er notað til að búa til mjöl í bæði brauð og pasta. Sjávarfang er mikilvægt í matargerð héraðsins. Ferskar ansjósur eru uppáhaldsforréttur eða aðalréttur. Sverðfiskur, túnfiskur, sardínur og karfi eru líka vinsælar fisktegundir. Kanínur og kálfakjöt má finna í vinsælum kjötréttum, má t.d. nefna “Tomaxelle” (kálfarúllur) og “Coniglio in Umbido” (kanínukássa). Á klettaströnd Lígúríu er ekki mikil ostaframleiðsla en ostar frá öðrum héruðum Ítalíu hafa unnið sér sess í matarvenjum héraðsins. Einkum notkun á Parmigiano-Reggiano til að búa til Pesto. Sauðamjólk er notuð í Pecorino og einnig í ricotta- osta. Ábætisréttir í Lígúríu eru m.a. “Pandolce Genovese”, sætt brauð sem búið er til úr niðursoðnum ávöxtum, rúsínum og hnetum, og sætar pitsur með valhnetum, kastaníuhnetum og niðursoðnum ávöxtum.

Uppskrift frá Lígúríu:

Valhnetu- og hvítlaukssósa

500 g valhnetur

10 g furuhnetur

12 msk jómfrúar-ólífuolía

1 hvítlauksrif

2 msk söxuð steinselja

salt og pipar

Þessi sósa hentar vel með pasta eða gnocchi.

1. Setjið valhneturnar í sjóðandi vatn og látið standa í nokkrar mínútur til að geta tekið mesta hýðið af þeim.

2. Að þessu loknu á að setja hvítlauk, furuhnetur og gróft salt í mortél og steyta saman, bætið svo steinselju og valhnetum út í og gerið að mauki. Bætið olíunni smátt saman við á meðan hrært er.

3. Kryddið með salti og pipar.