Adríahafið býður upp á mikið úrval fisk- og skelfisktegunda sem sumar eru sjaldgæfar og finnast aðeins þarna. Því kemur ekki á óvart að tveir af aðalréttunum eru fiskisúpur, “Brodetto” og “Muscioli alla marinara”, kræklingur sem settur er á pönnu og eldaður yfir eldi. Næst á eftir fiski er svínakjöt vinsælast og er uppistaða í mörgum réttum frá Mið-Ítalíu. Íbúar Marke segjast vera upphafsmenn “Porchetta”, það er beinlaust svínakjöt steikt á teini og kryddað með fennel og hvítlauk.

Pasta, það er maccheroncini og tagliatelle, hefur áunnið sér mikilvæga hefð í Marke og konurnar á þessu svæði eru frægar fyrir að vera miklir meistarar í pastagerð. Sveppir vaxta víða í héraðinu. Þrjár tegundir af trufflusveppum finnast í Marke og það eru haldnar þrjár truffluhátíðir í Acqualagna á hverju ári. Blómkál frá þessu héraði er frægt um alla Ítalíu. Og eplin, ferskjurnar, fíkjurnar og kirsuberin eru einstök að bragðgæðum, sem ber vitni hinum frjósama jarðvegi.

Uppskrift frá Marche:

Skötuselur með tómat- og hvítvínssósu

800 g skötuselur

250 g ferskir plómutómatar

4 msk saxað ferskt rósmarín

handfylli af steinselju – gróft söxuð

hvítlauksrif

8 msk ólífuolía

hálft glas af hvítvíni

chili-flögur – má sleppa

salt og pipar

Leiðbeiningar:

1. Byrjið á því að skera kross í alla tómatana, hellið yfir þá sjóðandi vatni og látið standa í eina mínútu. Þá losnar hýðið og er hægt að renna því af. Skerið svo tómatana í helminga og skrapið fræin innan úr.

2. Skerið fiskflökin í stóra bita, hafið roðið á.

3. Steikið hvítlaukinn í olíunni á lágum hita ásamt chili-flögunum og helming af rósmarín og steinselju. Bætið fiskinum í og látið krauma í 1–2 mínútur.

4. Hellið hvítvíninu í pottinn og leyfið því að gufa upp að mestu, bætið svo tómötunum út í, lækkið hitann og setjið lok á pottinn. Sjóðið í 10 mínútur, bætið svo afgangnum af jurtunum út í og sjóðið í 10 mínútur í viðbót.