Grikkir, Feneyingar, Rómverjar, Arabar, Mormannar, Frakkar og Spánverjar hafa allir þrammað yfir Sikiley einhvern tíma og áhrif þeirra eru augljós í matargerð svæðisins. Grikkir höfðu áhrif á undirbúning matargerðar úr fiski og grænmeti. Arabar komu með eggplöntuna, spínat, aprikósur, möndlur, kúskús og kryddjurtir og sýndu Sikileyingum hvernig geyma má fisk og ávexti og eins hvernig á að útbúa sumt af þeim sætindum sem þeir eru svo frægir fyrir. Normannar þróuðu bökunarlist Sikileyinga.

Þrátt fyrir útlend áhrif er pasta grunnefni í matargerð Sikileyinga, með sósum sem gerðar eru úr fiski og grænmeti. Eggplantan er vinsælasta hráefni eyjunnar, en tómatar, laukur, kúrbítur, kapers, hvítlaukur, broccoli, paprika og blómkál eru einnig mikið notað hráefni.

Ekkert sýnir jafn vel hvílík fjölbreytni einkennir matargerð Sikileyinga eins og ferð um markað á Sikiley, “La vucciria”, sem er blómlegur útimarkaður þar sem allt mögulegt fæst. Þar má finna marsipan og ólífur, gómsæta ávexti og grænmeti, góða osta og alls konar fisktegundir (þó að sverðfiskur, túnfiskur og sardínur séu helstu fisktegundir svæðisins).

Sikiley hefur fleiri vínræktarakra en nokkurt annað ítalskt svæði enda þótt vínneysla á íbúa á Sikiley sé minni en annarra Ítala. Mörg vínber þarf til að framleiða rúsínur, sem er annað lykilhráefni í sikileyskum réttum, og desertvín eins og stolt og gleði Sikileyjar, Marsala. “Cannoli” (rjómafyllt kramarhús) eru frægustu sætindi Sikileyjar, en ís og krapís hefur líka verið háþróaður. Eyjan er einnig fræg fyrir hunang sitt.

Uppskrift frá Sikiley:

Djúpsteiktar hrísgrjónakúlur með nautahakki og osti

1 kg hrísgrjón

3 egg

150 g provolone-ostur eða gouda

150 g kjöthakk

100 ml heimalöguð tómatsósa

50 g frosnar grænar baunir

Leiðbeiningar:

1. Steikið hakkið á pönnu og bætið út í tómatsósu og baunum, látið þetta malla þar til frekar þurrt.

2. Sjóðið hrísgrjón, hrærið osti og eggjum saman við þegar grjónin eru hæfilega soðin. Leyfið þessu svo að kólna.

3. Mótið kúlur með því að fletja 3 msk af hrísgrjónablöndu í lófanum, setjið eina matskeið af hakki í miðjuna og lokið til að mynda kúlu. Rúllið kúlunum upp úr hveiti og djúpsteikið í ca fimm mínútur. Berið fram heitt eða kalt.