Á austurströndinni, þar sem Miðjarðarhafið og Pyrenea fjöllin mætast er Katalonía. Héraðið er að mestu leyti skógi vaxið en lítið er um graslendi og beitilönd. Barcelona er höfuðborg héraðsins og tungumálið er að mestu leyti svokölluð katalóníska.

Katalonía er eitthvað hagsælasta hérað Spánar. Þar er mikið ræktað af maís, hör, hveiti, lakkrís, möndlum, hnetum, fíkjum og ávöxtum. Mikið er um fiskveiðar en Barcelona er stærsta hafnarborgin á Spáni.

Nálægt Pyreneafjöllunum er mikið um sveppatínslu og um margar tegundir er að velja. Frábært er að steikja ferska villisveppi uppúr smjöri, salti, pipar, hvítlauk og steinselju og hafa sem meðlæti.

Katalóníumenn eru miklir mathákar og byrja yfirleitt máltíð með ?Pa amb tomáquet? sem er léttristað brauð með maukuðum tómötum og jómfrúarólífuolíu. Þeir eru einnig þekktir fyrir þá frægu hvítlaukssósu sem kölluð er á spænsku ?allioli?. Í þeirra augum er matur skemmtun enda eru matarmarkaðirnir á Las Ramblas og La Boquería alveg stórskemmtilegir og mannlífið í kring frábært, hér finnurðu fyrir því að þú ert lifandi.

Uppskriftir úr Katalóníu:

Saltfiskur með Samfaina sósu

1 eggaldin

1 rauð paprika

1 græn paprika

4 tómatar

1 kúrbítur

2 laukar

2 hvítlauksgeirar

2 tsk paprikuduft

Hveiti

800 gr saltfiskur

½ glas hvítvín

20 tsk ólífuolía

Salt

Pipar að vild

Leiðbeiningar:

1. Útvatnið saltfiskinn í 24-28 tíma, skiptið um vatn reglulega. Þegar saltfiskurinn er tilbúinn, hefjist handa við að útbúa grænmetið fyrir samfaina sósuna. Þvoið og hreinsið kúrbítinn, eggaldinið, laukana og paprikurnar. Skerið þau í 1 cm bita og leggið til hliðar án þess að blanda þeim saman. Skerið hvítlauksgeirana, þvoið tómatana og skerið til helminga. Fjarlægið fræ þeirra og fjarlægið skinnið af þeim.

2. Setjið 12 tsk af ólífuolíu á djúpa pönnu og setjið laukinn og hvítlaukinn á pönnuna. Steikið lítillega og hrærið með viðarsleif mjög reglulega. Bætið paprikunum og steikið í 10 mínútur, hrærið í reglulega. Bætið því næst kúrbítnum og eggaldininu út í og eldið áfram í 10 mínútur. Stráið paprikuduftinu út í, hvítvíninu og kryddið með salti. Haldið áfram að elda þar til vökvinn hefur minnkað.

3. Skerið saltfiskinn í stóra bita án þess að fjarlægja roðið. Þerrið bitana með eldhúspappír og dífið þeim í hveiti. Brúnið fiskbitana á báðum hliðum, fjarlægið þá af pönnunni og setjið á eldhúspappír til að fjarlægja olíuna á þeim.

4. Flytjið steikta fiskinn í samaina sósuna og leggið fiskinn með roðhliðina niður. Látið allt hráefnið eldast á lágum hita án þess að hræra í til að koma í veg fyrir að fiskurinn brotni í sundur. Látið malla í 15 mínútur. Ef samfaina sósan minnkar um of, má bæta við heitu vatni.

Kartöflur með allioli

Fyrir 4-6

450 gr litlar nýjar kartöflur óflysjaðar

Hafsalt

1 msk steinselja fínsöxuð

Allioli sósa:

6-9 hvítlauksgeirar

Salt

Svartur pipar nýmalaður

1 ½ dl ólífuolía

Leiðbeiningar:

1. Látið kartöflurnar í pott með sjóðandi, söltu vatni og sjóðið þær meyrar.

2. Lagið sósuna á meðan. Kremið hvítlaukinn ásamt saltklípu í mortéli. Látið einn dropa af olíu saman við í senn. Þegar sósan þykknar má bæta olíunni hraðara í. Kryddið með salti og pipar.

3. Síið vel úr kartöflunum. Skerið kartöflurnar í bita jafnskjótt og þær kólna nóg til að meðhöndla þær og blanið þær allioli sósu og hafsalti. Stráið yfir þær steinselju og berið fram heitt.

Romesco sósa

Fyrir 6

3 hvítlauksgeirar óflysjaðir

225 gr bufftómatar

1 rauð paprika

25 bleiktar möndlur, léttristaðar

1 þurrkaður rauður chili pipar, bleitt í köldu vatni í 30 mín., síaður og fræhreinsaður

3 msk rauðvínsedik

1 ½ dl ólífuolía

Salt

Leiðbeiningar

1. Forhitið ofninn á hæsta straumi. Bakið hvítlaukinn, tómatana og rauðu paprikuna í 20-30 mínútur, en takið tómatana og hvítlaukinn út þegar mýkist og paprikuna þegar hún er orðin lítillega brúnuð.

2. Flysjið tómatana og paprikuna, fleygið fræjunum. Flysjið hvítlaukinn. Setjið grænmetið saman við möndlurnar og chili piparinn í blandara. Látið vélina ganga og hellið edikinu hægt í ásamt nægri olíu til að laga þykka sósu.

3. Notið salt eftir smekk. Látið standa í 3-4 klst áður en sósan er borin fram með kjöti, fiski og grænmetisréttum.

Zarzuela súpa

Fyrir 4

16 kræklingar

350 gr smokkfiskur

3 msk ólífuolía

450 gr ósoðnar rækjur í skel

550 gr skötuselur skorinn í 4 sneiðar

Salt

Pipar nýmalaður

4 msk spænskt brandí

1 stór laukur

1 tsk paprikuduft

2 bufftómatar flysjaðir, fræhreinsaðir og saxaðir

1 lárviðarlauf

1 dl þurrt hvítvín

1 dl fisksoð

3 saffranþræðir muldir

3 hvítlauksgeirar

3 msk söxuð fersk steinselja

Leiðbeiningar

1. Hreinsið og sjóðið kræklinginn, takið úr skelinni og setjið til hliðar. Hreinsið smokkfiskinn, saxið armana og sneiðið smokkana í hringi.

2. Hitið 3 msk af ólífuolíu í stórum eldföstum potti. Látið rækjurnar í og steikið þannig þær verði bleikar. Kryddið skötuselinn, leggið hann í olíuna og steikið á miðlungshita þar til hann verður ljósbrúnn.

3. Látið smokkhringina og armana út í og steikið stuttlega. Hellið brandílögginni út í og kveikið í. Hellið innihaldinu úr pottinum í skál þegar logarnir slokkna og setjið til hliðar.

4. Látið laukinn í pottinn og steikið vægt í u.þ.b. 4 mínútur þar til hann linast. Hrærið paprikuduftinu út í og steikið í 30-60 sekúndur. Látið tómatana út í pottinn ásamt lárviðarlaufinu og látið krauma í 2-3 mínútur. Hellið víninu í og sjóðið þar til sýður niður um þriðjung. Hellið soðinu í og látið þetta malla í 3-4 mínútur.

5. Myljið saffranið, hvítlaukinn og steinseljuna saman, blandið dálitlu heitu soði saman við og hellið í pottinn. Sjóðið í 1 mínútu. Látið innihaldið í skálinni, kræklinginn og rækjurnar út í og sjóðið í u.þ.b. 5 mínútur.